!!.. الظاهر هذه كانت ،،، عيديتــ !! ــي

6eflat's profile··!¦[· دُمُــ اللُّؤْلُؤ...PhotosBlogLists

Tools

Help

< Previous Next >

October 30

!!.. الظاهر هذه كانت ،،، عيديتــ !! ــي

.
.

.. ألف الحمدلله على سلامتي

حالتي اليوم ما تسر لا عدو ولا صديق .. والأصح أقول انه عندي عزا .. فديت موتري والله

!!.. تصدقون اليوم صدق اقتنعت بسالفة وجود " العين " .. والحسد

البارحة فليل كم وحده من بنات يراننا كانن سهرانات عندنا .. وهن ظاهرات من بيتنا .. شافن سيارتي .. ووقفن عدالها .. وحده فيهن تقولي والله حظج .. سيارتج روووووعه .. وتشتغلين ولا محتاجه لأحد .. قلت لها يالله عقبالج ان شاء الله .. عاد هي ردت وقالت لي .. بس حظج والله .. سيارتج وايد حلوه .. بكم ماخذتنها .. ويوم خبرتها قالت لي ،،، غاليه .. شو مكلفنج .. عاد انا تميت استهبل ،،، وخلاف قلت لها والله بنيه لا ورايه بيت ولا حرمه ولا مصاريف .. ليش ما أدلع عمري ههههههه .. يعني حتى ما قالن كلمة " ما شاء الله " .. وما واحالي أرقد وأنش إلا وصارت سالفه

.. اليوم الصبح وأنا رايحه الدوام .. اكتشفت النتيجة .. عنبوووه حد يسوي حادث الساعه 6 ونص الفير .. للأسف هذه أنا

الحمدلله .. الله ستر وإلا بصراحه يوم شفت منظر السيارة .. قلت زين اني ظهرت منها صاحية .. وزين انها الضربة ما يت صوبي .. وإلا الجانب الأيمن كله راح حتى التاير ما ادري وين اختفى ..!! والباب مول ما يتبطل .. نزلت من السيارة وأنا منصدمة .. وبعدني للحين مب مستوعبة شو السالفه .. يوم التفت ورا الموتر .. أشوف قطع متناثرة من البمبر والليتات .. ياربي شو أسوي به هالهندي اللي دعمني .. أذبحة وإلا أدعي عليه وإلا شو بالضبط ..!! حضرته يرد ريوس ولا يطالع وراه .. زين انها الضربة يت في الموتر ولا يت في انسان .. لكن والله شويه وبصيح .. وأول ما يا صوبي قلت له " حسبي الله ونعم الوكيل فيك " .. خاطري اذبحك بس ما اقدر

ورديت البيت .. لا دوام ولا هم يحزنون .. وتكنسلت خطط العيد وطلعاتي وكل شي .. لكن والله مب غامضتني إلا السيارة .. شكلها يكسر الخاطر .. يالله الحمدلله على كل حال .. وزين انها يت على جذه .. وأهم شي مثل ما قالوا " سلامتي " .. وبس

ما أدري متى الله بيفكنا من هالهنود .. والله ما أدانيهم

المهم أنا قررت أخيراً .. وبعد مشاورات إني خلاص .. ببيع اللكزس وباخذ لي كورولا .. لا حد بيقول حلوه ولا حد بيمدحها .. حتى بفتك من الهنود .. لأنهم يموتون في شي اسمه لكزس

لا تنسوووون تقولون لي .. " الحمدلله على السلامه " .. خخخخ

الظاهر هذه كانت عيديتي .. وما أقول غير الحمدلله والشكر على كل حال

.
.

1:35 PM | Blog it

Comments (11)

To add a comment, sign in with your Windows Live ID (if you use Hotmail, Messenger, or Xbox LIVE, you have a Windows Live ID). Sign in

Don't have a Windows Live ID? Sign up

	RaYaNaH-O-bass wrote: يا فديت كل سيارات الدنيا لعيونك بس اهم شئ سلامتك يا أختي .. عاد من رأيي الكورولا وايد زينة ما يحبوها الهنود بس ترى يحبوها الأندونيسيين .. يلا في الحديد و لا فيك يا عيني .. . . ريانة العــــــود Jan. 13
	ΜịĽŐŏŐ wrote: .. .. ----------------------MaLsoonaa----- 7amdallah 3ala salamah fee al7deed wala feech .. mtshofeen shar ^__^ ----------------------MaLsoonaa----- : : Dec. 31
	M♥§«roOo7Dubai»§♥M wrote: السلام عليكم ورحمه الله وبركاته يحليلج اختيه دموووع بالصدفه اليوم حدرت الاسبيس مالج ..ما شاء الله غاوي مثل راعيته مرتب وحلو (,") بس ما توقعت اني بقرا هالخبر لووول يحليلج يا دمووع وعلى فكره حتى وحده من هليه كانت تسوق لكزس وتنكسل الموتر بسبت العين ..يالله المهم ظهرتي بالسلامه Miss U.. Regard, ur sis .. roOo7 Dubai Nov. 30
	إنسان ثاني wrote: كل عام وانتِ بخير يا راعية اللكزس وسلامات طال عمرج عين وما صلت على النبي يحليل اللكزس وراعيتها وفداج 1000 لكزس ممكن نقوم بالواجب ونجمع تبرعات 50 درهم للفرد احم احم ما تشوفين شر وفي الحديد ولا فيييج وباركيلي على السوبر جارج ( الرنج اليديد ) احم احم خلينا نعيش حياتنا على رايج ... Nov. 8
	ana-a7bek-o-bas wrote: مرحبــا الســـــــــــاع . سلامــات اختيــه .. الشر ما اييج .. ويعله في عدوينج يا ربيـه . بس اليوم صدقتي هالسالفه وحليليه انا متعذبه بهـــاا تدرين اليوم في الدوامـ الكــل يشوف شيلتيه ويقول حلوه .. واخر الدوام خيوطهـا تقطعـن :( والله غمضتنيه .. ثاني مره البسهـا //( . سلامي :: أنا أحبك Nov. 7
	كِيمياءالمحبَّة1 wrote: سلااااااااااااامات .. وعيدج مبارك !! مو عيون !! الله يستر بس .. ويالله الا حديد اللي راح .. اهم شي ما صادش شي ابوي حاسبي مرّة فانية لين سقتي السيارة .. وسبيسج حلو .. والتحيّة Nov. 5
	A5er al3nQod wrote: الحمد لله على سلامتكـ حبوبة وماتشوفين شر .. والله هالهنود نتعب ونقوول بسنا من هم .. الهنود غطت على الشعب .. يمكن صارت هي الشعب !! اهم شي مااصابكـ شي .. وكل شي يتعوض وماساحتك حلوة مووت .. أنا ضفتها عندي في الFavorites space تستهلين يا الغالية :) وكــل عام وأنتِ بخير .. ومن العايدين دمتم بِود آخر العنقود Nov. 5
	Silent Splendor wrote: el7emdellah 3ala el slaameh o kel 3am wenty eb alf '7air =] Nov. 3
	ΜĕŞŧĂňşŐ wrote: سلاماااااااااااااااات اختي .. الحمدلله يات في الحديد ولا فيج ... أهم شي انتي ماصادج شي .. ... وكل عام وانتي بخير اختي .. و ثنكيو على الـ space الروعة .. ^^ ماشاء الله << لا تقولين باحسدج ههههههه .. ... والسموحة ... Nov. 2
	سراب wrote: الحمد لله على سلامتج اختي و بالمال و لا بالنفس يالله الحمد لله على كل حال و مساحتج وايد حلوة اتمنى لج التوفيق Oct. 31
	Mo0o0o0on141 wrote: سلام عليكم شخبارج عساج طيبة سلامات اهم شي انه ما صادج شي وسبيسج وايد وايد حلو بعد التغييرات سي يوو Oct. 30

Trackbacks

The trackback URL for this entry is:

http://6eflatel7ob.spaces.live.com/blog/cns!3D9F19725F7682ED!710.trak

Weblogs that reference this entry

None